lunes, 18 de marzo de 2013

24 de marzo, apta para nenos/as de 5 anos en adiante

Día: 24 domingo

Hora: As 9:30

Lugar: Ardeleiros (Fruime) Casa do Xan.

Roteiro: 4km

Circular

Por mor de que a semana pasada foi o día mundial das árbores e a vindeira será Pascua fixéeronse as seguintes actividades:

Empezamos a mañá coa elaboración da rosca de Pascua, no obradoiro da panadería. Coa masa fixemos as trenzas, deixamos repousar 2 horas, mentras aproveitamos para sair, xa que a choiva nolo permiteu, a facer a ruta e recoñecer as árbores do noso entorno. Carballos, castiñeiros, sobreiras, acivros, pinos, acacias, mimosas, laureiro e eucaliptos foron as árbores que os máis pequenos tentaban atinar co nome axudados dos seus acompañantes. De volta, na casa rural "Do Xan" fixemos unha mostra en cartulinas onde colocamos as diferentes follas cos nomes das árbores ás que pertencian. Voltamos á panadería, onde as roscas xa levedaran. Démoslle un baño de ovo co pincel e adornámolas con zucre humedecido. Listas xa para o forno armámonos de pala e.... adentro, cada un meteu a súa :)) Para completar a mañá fixemos un mural con fotografías de árbores antes nomeadas, dos seus froitos, paisaxes (Courel, Fraga do Eume), etc; que quedaron expostas no interior do merendeiro da casa "Do Xan". Despois dunha mañá de tanta actividade o único que nos quedaba era sacar as roscas do forno. Ao chegar atopámonos coa axuda dun panadeiro que se encargou de sacárnolas. En canto as ía sacando a todos se nos puxo cara de expectación para ver como quedara o traballo que cada un de nos fixera. Rematamos sobre a hora prevista, sobre as 13.40 horas. Axudou moito que a panaderia e a casa " Do Xan" estén ao lado unha da outra. Agradecementos:
 Supermercado Jefama (Noia)
 Panadería Manolo Urille
 Casa do Xan (Manolo Urille, en Ardeleiros)
 Concello de Lousame (departamento de cultura) e tamén a todos os que viñestedes a participar aínda que fixera mal tempo.






Fotos de Moncho e Rosa

actividades de sendeirismo en Semana Santa doutras entidades

Os concellos de Lousame e Boiro veñen de deseñar en colaboración un ruta de sendeirismo para o vindeiro 30 de marzo, coincidindo co sábado da Semana Santa. Trátase dun tramo da ruta “Río Grande – Río Beluso” que enlazará co municipio veciño de Lousame ata chegar ás minas de San Finx. Un percorrido de12 km e duración estimada de 4.30 horas, que ten o punto de partida na Capela de San Ramón de Bealo. É unha ruta cunha variada gama de paisaxes onde o visitante entra en contacto con diferentes tipos de bosque como os da ribeira do río Beluso, a panorámica da desembocadura á ría dende monte Seixiño (monte Castelo-Fruime). Asemade, poderemos ver en funcionamento un dos poucos muíños de río que quedan en funcionamento pola zona e, ao remate, visitaremos tamén o museo das minas en San Finx. Haberá un servizo de autobús que fará os traslados de San Finx ata San Ramón e de San Finx a Boiro ou a San Ramón. A ruta ten unha cota de inscrición de 3 euros e poden anotarse na Oficina de Turismo de Boiro, no mail turismo@boiro.org ou no teléfono 981842654 e na Oficina de Deportes de Lousame (Germán), no mail deporteslousame@gmail.com ou no teléfono 981820494 Oficina de Turismo. Praza de Galicia, s/n. Horario Semana Santa: De xoves a domingo, de 10:30 a 14:00 h

lunes, 25 de febrero de 2013

17 de marzo Rio Sieira (Porto do Son)


Foron 15 km, dificultade media,4-5 horas,saída ás 9 das Furnas (Xuño).
Percorrido: saimos da praia das Furnas e fomos polas pasarelas ata o merendero do Rio Sieira. Seguimos ata a ponte medieval e despois por campos e camiños ata Caamaño. A partir de aquí tivemos 4,5 km de subida, algunhas veces forte, pero por pistas de terra. Unha vez arriba xa é todo baixada cara Cabrais de arriba e de Abaixo. Son caminos un pouco técnicos porque hai moitas ramas e se pode tropezar. Tamén había moita auga así que foi moi recomendable levar botas. Chegamos ao Río Sieira e a partir de aquí se vai paralelo por corredoiras-ríos e por un "sendeiro de pescadores" ata O Zapatal en Xuño donde xa collemos pista asfaltada ata as Furnas.
Tivemos sorte co tempo, estivo unha mañá fabulosa, fomos arredor de 50 pes.
As fotos son de Paco.













domingo, 10 de febrero de 2013

24 de febreiro: Cabío-Coroso-Cabío


Os puntos de encontro foron ás 9:00 diante da Casa da Cultura da Cachada en Boiro (onde sempre) e ás 9:20 frente ao cámping de Cabío ("Ría de Arosa").

A Ruta Cabío-Coroso-Cabío durou aproximadamente 3 horas 45 minutos. A ruta non ten desniveis apreciables, tendo un perfil practicamente plano, por tanto é asequible a todos os públicos. Son sobre 14 kilómetros.

Dificultade: percorrido moi suave e agradable, algo urbanizado en partes.

Saimos do Cámping "Ría de Arosa", e ascendemos á Pedra da Moura, desde onde poidemos observar unha excelente vista da Ría de Arousa, continuando polo paseo marítimo da Lombiña (Cabío) ata a praia da Illa. Seguimos pola beiramar, en marea baixa pola praia da Corna ata a vila de Palmeira. Aquí fixemos unha parada no miradoiro do Castelo (lugar onde existiu unha torre medieval). Continuamos cara Insuela, a praia de Riazor e finalmente chegamos á Xunqueira e ao paseo marítimo de Coroso (Ribeira), dando a volta no bar de madeira no medio da praia. Regresamos polo mesmo traxecto por Palmeira ata a praia da Corna, desde onde atravesamos as dunas por unha pista que continúa entre campos ata a praia da Illa e finalmente alcanzando de novo a praia da Lombiña e o cámping de Cabío.

Desde o itinerario poidose observar toda unha serie de illotes que orlan o litoral Norte de Arousa: A Íngoa, A Illa dos Ratos, A Tixosa,  A Perilla Grande e Pequena, A Illa das Cabras e a Illa de Coroso, e ao lonxe, as illas de Arousa, Rúa e Sálvora, ademais da península do Grove, que foi illa hai varios séculos. Tamén pasamos polo porto de Palmeira, con diversas dornas, embarcacións tradicionais exclusivas da Ría de Arousa e Ons. Este porto ten polo menos 200 anos. O Miradoiro do Castelo recibe o seu nome porque na Idade Media encontrábase aquí unha pequena fortaleza propiedade do Arcebispado de Santiago.  O lugar chamábase O Castelo pero ninguén sabía porqué, en 1923 atopan uns documentos no arquivos arcebispais de Santiago que falan da súa existencia. Posteriormente as pedras do Castelo foron levadas ao parecer para a construción do Convento de Santo Antonio no Maño (A Pobra). Hoxe en día hai un monumento ao Emigrante.  Ao longo de todo o litoral atravesamos tamén algunha piscifactoría e praias con fondos mariños que son importantes bancos marisqueiros, por exemplo a praia de Coroso.

As Dunas da Corna é o sistema dunar mellor conservado da beira norte da ría. Conserva a vexetación dunar natural e acolle en primavera nos últimos anos de 1 a 2 parellas nidificantes de píllara (chorlitejo), unha ave litoral, da que só quedan unhas 100 parellas en Galicia. A competencia do espazo cos bañistas e a a predación de ovos por corvos e cans, son os principais problemas que ten, asi como a limpeza esaxerada de algas, que as priva de alimento. Nas dunas tamén se atopa unha planta escasa en Galicia, chamada Alyssum, exclusiva da costa norte de España e uns poucos lugares de Francia. Ten problemas de conservación ocasionados polo pisoteo e  a destrución de dunas por urbanización e construción de infraestruturas. A instalación de pasarelas de madeira pode axudar á súa conservación.

Na punta da Corna vimos unha zona de contacto entre dous tipos de rochas, o granito de Caldas de Reis e as rochas metamórficas. O granito de Caldas formouse hai uns 250 millóns de anos por unha elevación lenta dos materiais fundidos do interior da terra (por baixo das rochas da códea terrestre). Pola erosión das rochas superiores  queda ao descuberto. As rochas metamórficas presentes na Corna son chamadas xistos. Estas rochas son materiais que estaban antes dispostos en capas ( por arrastres ao fondo do mar desde a terra) e foron comprimidos a elevadas presións e temperaturas nos choques entre as placas dos continentes, deformándose aínda máis en contacto co granito a elevada temperatura. As presentes na Corna son da época precámbrica (de antes do Cámbrico, Cambria era o nome latino do País de Gales, onde hai rochas da época). Orixináronse entre 4000 e 600 millóns de anos (non sabemos exactamente a idade das da Corna). O precámbrico é a época dos máis antigos procesos de formación de montañas dos que quedan restos na terra (a códea terrestre créase e se destrúe através de millóns de anos).




Punta da Corna, contacto de 2 tipos de rochas





Fotos de Miguel e Vázquez.




martes, 22 de enero de 2013

RUTA DO ENTROIDO, sábado 9 de febreiro, apta para nenos/as a partir dos 5 anos


Nome: ruta do entroido

Día: sábado 9 de febreiro 

Hora: 15:30

Lugar: Polideportivo Pilar Barreiro Senra (Lousame, Cruido) onde o colexio

Circular, dificultade baixa

6,5 kms

Duración: Aproximadamente 2h. Dende as 15:30 a 17:30.

Apta para neno-as a partires dos 5anos

Seriamos arredor de 55 persoas, comezamos no poli  de Lousame andando ata achegarnos á Ponte de Berrimes onde empezaba a ruta por un sendeiro de pescadores á marxe do río San Finx, onde na vexetación predomina o loureiro. Seguimos polo monte ata chegar á aldea abandonada de Xei onde un pouco antes puidemos ver onde se xuntan os río San Finx e Vilacoba dando lugar a outro chamado Traba.

A nosa guía foi a Carapuchiña Vermella e como no conto, alí nos sorprendeu " O Lobo" a pequenos e maiores, oubeando pola fame que tiña. Despois de saciar a súa curiosidade polo que levaba na cesta a Carapuchiña  o que máis lle apeteceu da merenda foi un chourizo o cal lle demos e non tardou en meterlle os dentes tan grandes que tiña.
Xa recuperados do susto, seguimos pola marxe do río ata que nos saíron ao camiño "Os Cazadores" na procura do Lobo. Os máis pequenos déronlle a indicación onde atopalo.
Entre tanta sorpresa íamos moi entretidos pensando que xa so nos faltaba avistar a casa da " Avoíña ", e así foi....
A "Avoíña" estaba no portal da súa horta, non podía entrar, xa que perdera a chave. Amosámoslle a merenda e como todas as avoas son moi boas compartiu un paquete de galletas de chocolate, que como é tan lambona son as que máis lle gustan, cos máis cativos.

Proseguimos pola aldea do Couto, ponte do río Traba, San Bernardo para voltar a outra marxe, río arriba ata que vimos un gorila perdido no monte...animaliño. Como iría a dar alí??? A verdade e que nun día de entroido todo é posible :))

Media hora despois chagabamos o poli onde puidemos repoñer forzas cas filloas, orellas, chocolate, etc. Tamén tivemos concurso, obradoiro de maquillaxe, e demais.

E COLORÍN COLORADO A RUTA E O CONTO ESTA REMATADO.

Agradecemento:
Ruta amosada por: Ivan Horta (non presente)
Carapuchiña Vermella: Manoli
O Lobo e gorila: Carlitos
Cazadores: Manuel e Ivan
Avoíña: Loreto

Agardamos comentarios dos que asistiron á ruta







Fotos de Olivier, Rosa e Loreto


lunes, 3 de diciembre de 2012

20 de xaneiro Castro Barbudo - Rianxo





Os puntos de encontro foron ás 9 e 10 diante da Casa da Cultura de Boiro e ás 9.30 en Campo Maneiro - Tarragoña (Rianxo). Fumos arredor de 42 pés, contando por suposto a Duna.

A ruta foi sobre 8 km e medio, recortouse respecto ao previsto polo mal tempo, a chuvia acompañounos toda a ruta ao principio chovía pouco, pero contra o final caia con ganas, a dificultade media - baixa.

Empezamos a andar en Campo Maneiro e fomos ata Castro Barbudo, onde a pesar da chuvia disfrutamos dunhas bonitas vistas e pasamos por un interesante sendeiro de acacias.

Grazas Loli polas fotos!

Feliz 2013!



 A foto é do sendeiro máis perigoso do mundo, está na montaña sagrada de Hua - Shan (China)